---
title: "Neues vom Tegerscher Bueb"
author: "Gemeinde-News Degersheim"
published: 2023-08-24
region: "Degersheim"
canonical_url: https://flawil-degersheim.regioticker.ch/article/24-08-23-neues-vom-tegerscher-bueb
publisher: RegioTicker
image: https://www.degersheim.ch/newsimg/thumb_1692772162_230825tegerscherbuebgschichtvodechraee.jpg
---# Neues vom Tegerscher Bueb

**In unregelmässigen Abständen erscheinen im Fladeblatt Mundartgeschichten vom «Tegerscher Bueb», die sich vor rund siebzig Jahren tatsächlich in Degersheim zugetragen haben. In der aktuellen Ausgabe erzählt der Bueb, wie er und seine Familie zu einem ungewöhnlichen Haustier gekommen sind und welche Herausforderungen sie mit dem Tier zu meistern hatten. Die Identität des Tegerscher Bueb soll nach wie vor Teil von Spekulationen bleiben.**

In unregelmässigen Abständen erscheinen im Fladeblatt Mundartgeschichten vom «Tegerscher Bueb», die sich vor rund siebzig Jahren tatsächlich in Degersheim zugetragen haben. In der aktuellen Ausgabe erzählt der Bueb, wie er und seine Familie zu einem ungewöhnlichen Haustier gekommen sind und welche Herausforderungen sie mit dem Tier zu meistern hatten. Die Identität des Tegerscher Bueb soll nach wie vor Teil von Spekulationen bleiben.

Mini Brüedere händ im Schwalmetöbeli ä jungi Chräe ihgfange wo us em Näscht use gheit isch. Sie hät am Bode gschwaderet und min Brüeder hät sie ufglese und i d Arme gnoh. Me hät de Chräe vo do a Quacki gseit. Sie händ sie mit hei gno, hendere d’Flügel gstutzt und in Chüngelstall ine tue. Denn händ die zwei Buebe öppis ganz dumms gmacht. Sie hän ihre Brotbröckli mit Milch und e bitzli Schnaps zum fresse gäh. I dem betrunkene Zustand isch sie natürli hii und her torklet und vorne ufs Gsicht gheit. Wo de Vater das gseh hät, hät er zümpftig gschumpfe und hät beidne eis a d Ohre ghaue und grüeft: «So öppis machet er nie meh!»

Mit de Zyt sind em Quacki d’Flügel wieder gwachse und er isch immer wiiter äweg gfloge. Aber wemer ehm gruefe hät, isch er im Direktflug i sini Unterkunft zruck cho. De Quacki isch immer zutraulicher und frecher worde. Alles was glänzt hät, hät er gsammlet und isch im Schluf glageret worde. Immer wenn er vomene Usflug zruck choh isch, hät er öpis glänzigs im Schnabel ka. Zum Biespiel Vivi Cola-Deckeli, silbrigi Klebstreife vo de Zigarettepäckli und no anderi Sache. Ehmol isch de Quacki bim lande in Farbchübel mit roter Dispersionsfarb inne gheit. I üsere Gärtnerei hät me die Farb zum Uffrische vo Töpf und Tonware brucht. Während sinem ganze Vogellebe isch er mit emene rote Federbuuch und enere rote Untersiete vomene Flügel ume gfloge. Da hät ihn aber gar nid gstört. Mängmol isch er meh wie ne Stund fort gsi. Er isch is Fohrwädli oder in Fuchsacker gfloge, aber hät immer ufpasst, dass er keinere andere Chräe begegnet isch. Denn vo dene hät er Angscht gha wenn sie im Schwarm uf en losgange wäred. Er hät sich jo nid chöne wehre.

Im Triebbeet hät er alli geele Pflanzeetikette usepickt und schön ufenen Hufe glait. Natürli hät de Vater überhaupt kei Freud gha, hät er doch grad frisch verschiedeni Sorte vo Blueme usgsait gha. Jetzt hät er nüme gwüsst wo er was asgait hät und hät fescht gschumpfe. Em Quacki selber isch das ziemli glich gsi. Emol wo mehr friedlich verusse Znacht gässe händ, isch plötzlich de Polizischt do gstande. Er hät gsait, er haig scho viel Reklamatione vo üsere Chräe übercho. Sie sieg de Schuelchind uf Schultere gfloge, sitze blibe und hegi mängmol drufgschisse. So gäng das nüme wieter, so en freche Vogel müess me äweg tue. Au mir hend gwüsst, dass es nüme so goht und hend ihn leider müesse wegtue, au wenns üs schwer gfalle isch und mir ihn no lang vermisst hend.

---

> **Über RegioTicker:** RegioTicker ist ein regionaler Live-News-Ticker. Artikel werden von Vereinen, Verbänden und Einzelpersonen aus der lokalen Community verfasst, damit Einwohnerinnen und Einwohner jederzeit wissen, was in ihrer Region passiert.