Die Degersheimer FLADE-Redaktion bekam vor einiger Zeit Mundartgeschichten eines Degersheimer Knaben zugesendet. Sie spielen in «Tegersche» und sind tatsächlich so passiert. Die Geschichten geben einen interessanten Einblick in das Dorfleben vor rund 70 Jahren. Sie erscheinen nun in unregelmässigen Abständen im FLADE-Blatt. Wer der «Tegerscher Bueb» ist, sei an dieser Stelle (noch) nicht verraten.

Vor öpe 70 Johr hets z’Tegersche en Bueb gha, wo immer Blödsinn gmacht hät. Amol het er de Hermine im Garten alli Setzlig usgropft. D’Hermine isch e alti, armi Frau gsi, wo zum öberlebe en Gmüesgarte gha het. Me het denn i de ganze Steinegg ome gret ond het gsät: s’isch Nöldi’s Bueb gsi. Zor Strof het er alli Setzlig wieder müese ipflanze ond als Zusatz Strof het er alli Gartebeetli müese jete. Ond d’Hermine het au no ä Beetli Epeeri gha aber de Bueb het alli gesse. Er het au no öpe ä oriifs Beeri verwütscht und Buchweh öbercho. Ond uf de ganze Steinegg het me chuschelet: S’isch Nöldi’s Bueb gsi. De Bueb het ebe gmänt, wil er so viel het müese jete, er heg s’Recht of die Erdbeeri gha.

Nöldi’s Bueb het i de Schuel no das gmacht, wo ner gern gmacht het. Also Rechne isch gar nöd sini Stärchi gsi, Amol hens Rechnige müese löse ond er isch äfach nöd drus cho. Er het denn is Heft ine gschrebe; de Lehrer söll die Rechnige selber löse, de Lehrer chem doch selber nöd drus, drom heig er die Ufgob de Schüler ge. Ond will me so öpis nöd macht, het en de Lehrer vor Tör use gschickt. Im Normalfall isch de Bueb grad hä gange. Aber hüt isch es schwierig gsi, will d’Muetter Wöschtag gha het ond do isch Wöschchelle locker i ihre Hand gsi. So isch de Bueb i de Schuel uf em Bänkli gsesse grad vis a vis vom Schuelgstell und wo de Bueb de Hufe Schue moss aluege het er agfange Schueböndel mit enand z’verchnöpfe ond zemebinde. Die Sach isch bi de Lehrerschaft gar nöd guet acho. Lehrerschaft het denn de Abwart igschalte, was dozumal so üblich gsi isch. De Abwart het nöd lang Federlesis gmacht ond het gfröget; bisch du Nöldi’s Bueb? Jo de bini. Er het en am Ohr packt ond wie en Muni in Cheller abe gfüehrt. Mit em Chnebel, wo im Egge gstande isch, het er em s’ Födle verchlopfet. De Bueb het gwartet bis zom Lärmoo, wos denn so richtig Dunkel gse isch. Er het denn sini Hosesäck gföllt mit Grässome ond het de Some ofem Chesplatz bim Schuelhus gschtreut. Vier Woche spöter het me de Abwart met siner Frau gseh de Chesplatz jäte.

Ond gär niemer het gfröget, isch das Nöldi’s Bueb gsi. Wer isch ächt Nöldi’s Bueb gsi? Also, min Vater het Arnold ghäse.